Вячаслаў Цэхановіч і Аляксандр Найдзёнаў.
Вячаслаў Цэхановіч, ураджэнец аграгарадка Пухавічы, другі раз перамог у суперфінале інтэлектуальнага шоу “На вылет”, якое трансліруецца ў вячэрнім эфіры тэлеканала “Беларусь 1” па нядзелях. Вядучы Аляксандр Найдзёнаў падкрэсліў, што такое ў гульні адбылося ўпершыню.
Наш земляк — пастаянны ўдзельнік шоу. Тройчы Вячаслаў даходзіў да суперфінала — апошняга этапу гульні. Два разы станавіўся пераможцам і ўладальнікам сертыфіката на 2000 беларускіх рублёў.
— Я разумеў, што многія супернікі мяне ведаюць і могуць адправіць “на вылет”, таму стараўся актыўна даваць адказы на пытанні, — гаворыць Вячаслаў. — У гэтай гульні многае залежыць ад фартуны, бо ў камандзе восем чалавек, і ўсе адначасова адказаць не могуць. На шчасце, удача прыйшла да мяне.
У суперфінале Вячаславу дасталося такое пытанне: “У жніўні 1937 года жыхары і госці Мінска, якія сабраліся на стадыёне “Дынама”, маглі назіраць, як на высокай мачце стадыёна спачатку быў узняты чырвоны паветраны шар. Затым праз розныя прамежкі часу адзін за другім — шэсць зялёных. Які прадмет сёння выконвае функцыі гэтых шарыкаў?”
Праз адведзеныя 30 секунд наш зямляк даў правільны адказ — электроннае табло.
— Дакладнага адказу я не ведаў, дапамагла інтуіцыя, — гаворыць Вячаслаў. — Мне падабаюцца гульні, дзе можна праверыць свае веды. Нядаўна перамог у інтэлектуальнай віктарыне праграмы “Добрай раніцы, Беларусь!”.
Вячаслаў раіць усім прыняць удзел у шоу. Перш за ўсё, ён стаў прыкладам для сваёй сям’і. Жонка Аксана дайшла да фіналу, а дачка Таццяна з першага разу перамагла ў суперфінале, як бацька. Хаця, прызнаецца дзяўчына, ішла на шоу дзеля сэлфі ў студыі.
У чым сакрэт такога поспеху? Вячаслаў дае простую параду: быць цікаўным і больш чытаць. Мужчына і цяпер удзячны былым настаўнікам Пухавіцкай сярэдняй школы Любові Цэхановіч, Але Ралькевіч, Васілю Лапко, якія прывілі цікавасць да гісторыі і мовы (Вячаслаў у паўсядзённым жыцці карыстаецца беларускай мовай). Яго мэта на бліжэйшы час — прыняць удзел у праграме “Што? Дзе? Калі?” і перамагчы.
Кацярына ВЕРНІКОЎСКАЯ.